Изборот на вистински архитект може да биде клучен за удобноста на Вашиот дом. Доколку донесете лоша одлука, може да се соочите со доцнења, дополнителни трошоци и компромиси со квалитетот. За да го избегнете тоа, важно е да поставите вистински прашања пред да изберете архитект. Еве ги шесте најважни прашања кои ќе ви помогнат да донесете правилна и информирана одлука.

1. Какво е вашето искуство со проекти како мојот?

Не сите архитекти имаат искуство со типот на проект што го планирате. Доколку градите семејна куќа, комерцијален објект или сакате реновирање, ќе Ви биде важно да архитектот има релевантно искуство со таков вид на проекти. Побарајте примери од нивната претходна работа и обидете се да стапите во контакт со нивни претходни клиенти за да добиете искрени препораки.

2. Кои услуги ги нудите и до кој степен сте вклучени во процесот?

Некои архитекти работат само на дизајнот и подготвуваат цртежи, додека други нудат комплетна услуга – од добивање дозволи, избор на материјали, до надзор на градбата. Во овој процес битно е дали архитектот би можел да се ангажира во текот на изведбата на ваквиот проект, со цел да се осигура дека презентираниот проект ќе биде изведен како што бил замислен. Дефинирајте што точно ви треба и осигурајте се дека архитектот може да ги задоволи вашите очекувања.

3. Колку чини вашиот ангажман и како се пресметуваат трошоците?

Буџетот е секогаш еден од клучните фактори. Архитектите може да наплатуваат фиксна сума, процент од вкупниот трошок на проектот или цена по квадратен метар. Побарајте детална понуда со сите потенцијални дополнителни трошоци за да избегнете непријатни изненадувања во иднина и пробајте тоа да го договорите на писмен договор пред почетокот со работата.

4. Како се справувате со неочекувани предизвици во текот на проектот?

Секој градежен проект има непредвидени проблеми – било да се тоа законски регулативи, промени во дизајнот или проблеми со изведувачите. Искусен архитект треба да може проактивно да најде решенија и да ја минимизира загубата на време и пари. Прашајте ги за примери на предизвици со кои се соочиле и како ги решиле.

5. Како комуницирате со клиентите и колку често ќе бидам информиран за напредокот?

Дали архитектот претпочита редовни состаноци, мејлови или телефонски разговори? Дали ќе бидете информирани за секоја промена во проектот? Јасната комуникација е клучна за да нема недоразбирања и изненадувања во текот на процесот.

6. Можете ли да ми дадете препораки од претходни клиенти?

Реалните искуства од претходни клиенти се најдобар показател за квалитетот на услугата. Добрите архитекти ќе имаат задоволни клиенти кои ќе бидат подготвени да ги споделат своите искуства. Ако архитектот не сака да даде контакти од претходни клиенти, тоа може да биде негативен знак.